Kom ons vertaal tog wordpress.com in Afrikaans?

Die mense van wordpress.com wil graag vir ons wordpress blogge in Afrikaans gee, maar hulle praat nie die Taal nie. Kom ons help hulle om die vertaling tog in hierdie millenium klaar te maak?

Blaai na die vertaling blad en vertaal so paar stringe Ingels. Daar is minder as 4000 stringe om te vertaal, so ek reken 400 Afrikaanssprekendes wat elk net 10 stringe vertaal sal sommer gou-gou deur die oefening draf.

As daar snaakse goeters soos “&amp;” of “&nbsp;”, of enigiets wat so tussen “<” en “>” staan in die string voorkom, spoeg en plak die hele string in die vertaling veld en vertaal dan net die ander Engelse woorde. Daai “snaakse” goeters is wat jou WordPress so mooi laat lyk.

Kom-kom! Waarvoor wag jy? Ek het klaar meer as my 10 stringe vertaal!

Om WordPress in Afrikaans te vertaal

Jy kan jou WordPress installasie in Afrikaans vertaal. En nee, dis nie so moeilik soos wat jy dink nie. Ek sal gou-gou die stappe hier vir jou verduidelik (sal net werk vir mense wat ftp toegang tot hul webruimte het):

1. Kry die Afrikaanse .mo dokument vir WordPress in die hande.

Blaai na Afrikaanse vertaling van WordPress 2.0 of Afrikaanse vertaling van WordPress 1.5, afhangende van jou WordPress weergawe, en klik die “Download” skakel in die liker keuselys. (Jy sal moet registreer as lid van die Rosetta projek.)

Merk nou die .mo keuse en klik die “Confirm Download” knoppie. Dit gaan ‘n paar minute vat vir die gawe mense by Rosetta om jou dokument reg te kry vir aflaai, en dan stuur hulle vir jou ‘n skakel per e-pos. Klik die skakel en stoor die dokument êrens waar jy hom weer sal kan kry.

2. Laai die .mo op na jou webruimte.

LET WEL: Verander die .mo dokument se naampie tog na die korrekte een toe! Die .mo dokument mag dalk eenvoudig “af.mo” genoem wees, maar sommigge mense hou daarvan om die ding “af_AF.mo” the noem. Dis VERKEERD! Die naam moet of plein “af.mo” wees, of “af_ZA.mo” (die taal afkorting en die land afkorting). Vir een of ander rede dink almal die mense in Afganistan praat Afrikaans, maar ons weet dis nie so nie.

Gebruik jou ftp klientprogram en gooi die .mo dokument in die wp-includes/languages/ dokumentlys van jou webruimte. As die “languages” sublys nog nie in jou “wp-includes” dokumentlys bestaan nie, maak hom.

3. Sê vir WordPress jy praat Afrikaans

Maak die wp-config.php dokument oop in jou gunsteling teks wysiger. Soek vir die lyn wat lees “define (‘WPLANG’, ”);” en verander dit na “define (‘WPLANG’, ‘af’);“, of “define (‘WPLANG’, ‘af_ZA’);“, afhangende van jou .mo se naam.

4. … O, nee! Jy’s klaar!

Soos meeste dinge in WordPress, is dit dan ook maar al wat jy hoef te doen. Drie maklike stappies, en jou WordPress praat Afrikaans!

Joegaai!

Om te blog in Afrikaans

Ek is een van daai mense wat heeltemal goed regkom in ‘n paar ander tale, maar wat maar net nooit ‘n gelyke vir Afrikaans kon raakloop nie. Ek laaik Afrikaans. Ek praat, sing, droom, dink en vloek in Afrikaans. Maar tot nou toe kon ek nog nooit lekker in Afrikaans blog nie!

Ek hoop dat hierdie blog dinge so ‘n bietjie sal verander. Ek hoop Afrikaans.WordPress.com is die ligpuntjie waarna derduisende Afrikaanse bloggers al jare soek.

Op die Internet is alles mos Engels. En dis gewoonlik goed so. Maar as dit by bloggery kom behoort ons tog seker te kan skryf soos ons lekkerkry, of hoe?

Wel, ek kry lekker in Afrikaans! En dis nou net waar die pô-pô die fên straaik!

Verbeel jou:

(Een donker nag… so week gelede… deur ‘n lêptoppie op ‘n groot, vuil lessenaar aan die Kaapse Suidkus… so tussendeur die stoeiery met die blêrrie 3G kaartjie wat maar net nie wil 3G nie…) Die geringde nafi sluip deur die kuberruim na waar WordPress, die uitstekende web-joernaal dienssagteware, wag om (gratis, vry en verniet) afgelaai te word.

Opwinding! Installasie… Sukses!

Maar toe nafi die WordPress in Afrikaans wil hê, is daar nêrens op die ganse Internet ‘n plek om die nodige .mo dokumente af te laai nie!

Dit het baie soek en vinnig leer gekos, maar nou is WordPress in Afrikaans vertaal. Ek stel met graagte die .po en .mo dokumente hier beskikbaar om (ook gratis, vry en verniet) afgelaai te word. En ek hoop julle gebruik en geniet dit:

  • af_ZA.mo – die vertaalde masjienkode wat jy kan gebruik om WordPress 2.1.2 in Afrikaans te kry. (Gooi hom eenvoudig in die “wp-includes/languages/” dokumentlys (directory) van jou WordPress installasie. O, en verander die php lyn define (‘WPLANG’, ”); in wp-config.php na define (‘WPLANG’, ‘af_ZA’); )
  • af_ZA.po – die Afrikaanse vertalingskatalogus vir WordPress 2.1.2, wat jy kan gebruik om my kranklike vertaling in Afrikaans te wysig (m.b.v Poedit).

Die Afrikaanse vertaling is in die vroë oggendure gedoen, so daar mag foute wees. Ek hoop jy sal so gaaf wees om my te laat weet van enige onbesonne woordkeuses in die .po vertalingskatalogus?

Laat weet asseblief as jy ook wil deel wees van die Blog in Afrikaans beweging. Daar is altyd iets wat in Afrikaans vertaal kan word!

Nou moet ek nog net die manne op die hoogtes by WordPress.com kry om die Afrikaanse WordPress ook hier beskikbaar te stel…

Follow

Get every new post delivered to your Inbox.